Mental sağlamlıq insan həyatının ayrılmaz parçasıdır. Amma hələ də bir çox cəmiyyətlərdə bu mövzu tabu olaraq qalır. Xüsusilə də Şərq ölkələrində psixoloqa müraciət etmək “ayıb” və ya “zəiflik” kimi dəyərləndirilir. Halbuki bu yanaşma həm fərdi, həm də ictimai səviyyədə ağır nəticələr doğurur.
Tabunun kökləri
Ənənəvi düşüncələrdə psixoloqa müraciət çox vaxt “dəlilik”lə eyniləşdirilir. İnsanların “məni psixoloqa gedən görsə, nə deyərlər?” qorxusu onları susmağa, öz problemlərini gizlətməyə məcbur edir. Bu susqunluq isə nəticədə depressiya, panik atak, intihar düşüncələri, ailədaxili münaqişələr və sosial təcrid kimi fəsadlara gətirib çıxarır. Əslində isə psixoloqa getmək zəiflik deyil – gücün, özünü dərk etməyin göstəricisidir.
Şərq cəmiyyətində stereotiplər
Bizim mədəni mühitdə ailə və qohum çevrəsi insanın əsas dayağı sayılır. Əksər hallarda hər bir problem ailə içində həll olunmalı imiş kimi qəbul edilir. Bu yanaşma isə peşəkar yardımın əhəmiyyətini azaldır, psixoloji rifahın təmin olunmasına mane olur. Halbuki ailə dəstəyindən əlavə, mütəxəssis yardımı insanın həyatını köklü şəkildə dəyişə bilər.
Psixoloqa müraciətin əhəmiyyəti
Necə ki, bədən sağlamlığımız üçün həkimə müraciət edirik, eyni qayda ilə zehni sağlamlığımız üçün də psixoloqa getməliyik. Psixoloji dəstək yalnız ağır xəstəliklərdə deyil, gündəlik stress, münasibət gərginliyi və iş həyatı ilə bağlı çətinliklərdə də zəruridir. Psixoloqla söhbət insanın özünü daha yaxşı tanımasına, daxili gücünü kəşf etməsinə və həyat keyfiyyətini yüksəltməsinə imkan verir.
Tabunu necə aşmaq olar?
– Maarifləndirmə – Cəmiyyətə izah edilməlidir ki, psixoloqa getmək ayıb deyil, ehtiyacdır.
– Rol modelləri – Tanınmış şəxslərin bu barədə açıq danışması stereotiplərin sınmasına yardım edə bilər.
– Təhsil – Məktəb və universitetlərdə psixoloji sağlamlıq mövzusu açıq müzakirə olunmalıdır.
– Media – Filmlər, verilişlər və sosial şəbəkələr vasitəsilə psixoloji dəstəyin faydaları göstərilməlidir.
Psixoloji yardım almaq ayıb deyil – ehtiyacdır. Bu ehtiyacı ödəmək insanın həm şəxsi xoşbəxtliyi, həm də sağlam cəmiyyətin formalaşması üçün vacibdir. Mental sağlamlığa diqqət göstərmək, insanın özünə verdiyi ən böyük dəyərdir.
Şəbnəm Hüseynova
Paraqraf.com
