Danimarkada PUA təhlükəsi? – Baltik dənizi üzərinə qırıcı qaldırıldı

Danimarka Baltik dənizindəki Bornholm adası üzərində pilotsuz uçuş aparatlarının (PUA) görüldüyü iddiası ilə bağlı xəbərlər fonunda əraziyə krallığın silahlı qüvvələrinə məxsus qırıcını göndərib.

Paraqraf.com xəbər verir ki, bu barədə TV2 yerli polisə istinadən məlumat verib.

Məlumata görə, Bornholm sakinləri PUA-nın əvvəlcə adanın üzərindən bir istiqamətə, daha sonra digər istiqamətə uçduğunu bildiriblər.

Sentyabrın 25-də Danimarkanın müdafiə naziri Troels Lund Poulsen bəyan etmişdi ki, krallıq pilotsuz uçuş aparatlarının ölkənin hava məkanına haradan daxil olduğunu bilmir, lakin onlar mütləq şəkildə peşəkar tərəfindən buraxılıb.

O qeyd edib ki, Danimarka hərbçiləri qalıqların sakinlərin evlərinə düşəcəyindən ehtiyat etdikləri üçün PUA-ları vurmayıblar. Nazir əlavə edib ki, PUA-ların Rusiyaya məxsus olduğuna dair heç bir sübut yoxdur.

Xatırladaq ki, sentyabrın 23-də Danimarka hakimiyyəti Kopenhagen bir neçə PUA-nın hava limanı yaxınlığında aşkarlanmasından sonra hava limanının fəaliyyətini dayandırmışdı. Danimarka polisinin məlumatına görə, hava limanı üzərində 2-4 “böyük” pilotsuz uçuş aparatı görüntülənib.

Paraqraf.com