Cəmiyyətin inkişafı, dövlətin gücü və millətin gələcəyi birbaşa təhsilin səviyyəsi ilə ölçülür. Bu gün dünyada baş verən sürətli dəyişikliklər bizdən yalnız bilik toplamağı deyil, həm də daim yenilənməyi, öyrənməyi və öyrətməyi tələb edir. Təhsildə tərəqqi dedikdə, sadəcə dərsliklərin dəyişməsi və ya yeni texnologiyaların tətbiqi nəzərdə tutulmur. Əsl tərəqqi insan kapitalının zənginləşməsi, şagird və tələbələrin düşüncə üfüqlərinin genişlənməsi, müəllimlərin isə yeni dövrün çağırışlarına cavab verə bilməsi deməkdir.
Müasir zamanda təhsilin qapıları sinif otaqlarından çox-çox uzağa açılır. Virtual platformalar, onlayn kurslar, elektron kitabxanalar bilikləri hər kəs üçün əlçatan edir. Bu, təhsildə demokratikləşmənin ən gözəl nümunəsidir. Artıq təhsil almaq üçün məkan və zaman məhdudiyyəti yoxdur – öyrənmək istəyən üçün yol həmişə açıqdır.
Ancaq tərəqqinin əsasında texnologiya yox, insan dayanır. Müəllimlərin bilik və bacarıqları, onların tələbələrə yönəlik səmimi yanaşması təhsil sisteminin güzgüsüdür. Müasir müəllim auditoriyada sadəcə məlumat ötürən deyil, həm də tələbəni düşünməyə, araşdırmağa, sorğulamağa sövq edən bələdçidir. Təhsildə tərəqqi müəllimin peşəkarlığından başlayır və onun nümunəsi ilə davam edir.
Şagird yönümlü yanaşma isə bu günün əsas şərtidir. Uşaqların maraqlarına, istedadlarına dəstək verilmədikcə təhsil yalnız statistik rəqəmlərdən ibarət olar. Halbuki əsl tərəqqi insanın özünü tapmasına, cəmiyyətə faydalı bir fərd kimi yetişməsinə şərait yaratmaqdır.
Azərbaycan da bu yolda mühüm addımlar atır. Təhsil islahatları, beynəlxalq layihələr, yeni tədris metodlarının tətbiqi gənclərə daha geniş imkanlar açır. Bu proseslər sadəcə gələcəyin mütəxəssislərini deyil, həm də müasir düşüncəli, dünyaya açıq və milli dəyərlərinə bağlı gənc nəsli formalaşdırır.
Unutmayaq: təhsil bir millətin nəfəsidir. Nə qədər dərin, sağlam və aydın olsa, cəmiyyət də o qədər güclü olar. Təhsildə tərəqqi – gələcəyin ümid işığıdır.
Həsən Məmmədov, Paraqraf.com
