SOCAR-ın İnvestisiya departamentinin sabiq rəhbər müavini, həbsdə olan iş adamı Adnan Əhmədzadənin vəkili Şaiq Mirzəyevin dövlət qurumunda vəzifə tutması ilə bağlı məlumatlar yayılıb.
Paraqraf.com xəbər verir ki, bu barədə hüquqşünas Əkrəm Həsənov sosial şəbəkədə məlumat yayıb.
O, Ş.Mirzəyevin Əmək və Əhalinin Sosial Müdafiəsi Nazirliyinin tabeliyindəki Əmək Bazarı və Sosial Müdafiə Məsələləri üzrə Milli Observatoriyasının department müdiri olmasını əks etdirən foto paylaşıb. Nazirliyin saytından edilmiş skrində vəkilin həmin nazirlikdə Hüquq, kadrlar və sənədlərlə iş departamentinin müdiri vəzifəsini tutması əks olunub.
Ə.Həsənov qeyd edib ki, vəzifəli şəxsin vəkil kimi başqa şəxslə müqavilə bağlaması qanunvericiliklə qadağan edilib.
Bundan bir neçə dəqiqə sonra isə qurumun saytından Şaiq Mirzəyevin department müdiri olmasına dair məlumat və foto silinib.
Əmək Bazarı və Sosial Müdafiə Məsələləri üzrə Milli Observatoriyanin mətbuat katibi Fidan Seyidşahqızı məlumat ictimailəşəndən sonra açıqlama verib. O bildirib ki, Şaiq Mirzəyev hazırda Milli Observatoriyanın əməkdaşı deyil: “Onunla əmək müqaviləsinə 15 sentyabr tarixindən xitam verilib”.
Xatırladaq ki, Adnan Əhmədzadə sentyabrın 19-u saxlanılıb, bir gün sonra isə onun barəsində 4 aylıq həbs qətimkan tədbiri seçilib.
Kəmalə Vəliyeva, Paraqraf.com
